ده كلام يا احمد

إستووا.. إعتدلوا.. إستقيموا يرحمكم الله

الله أكبر
الله أكبر.. أحمد ركز بأه في الصلاة وبلاش تسرح، طيب خلاص، إمممم..
هو الراجل اللي جنبي ده صوابع رجليه عاملة كده ليه؟
صباعه الكبير ده كبير أوي، آه بمناسبة الصوابع هي صوابع زينب دي اللي هيا إيه؟
بيتهيألي دي اللي عاملة زي الزلابية، زلابية؟؟ زلابية إيه بس وبتاع إيه

الله أكبر
أحمد ركز ياأحمد، طيب ماأنا مركز أهوه، مركز إيه طيب إنت قريت سورة إيه؟
أنا قريت سورة الاخلاص شفت بأه أنا مركز إزاي؟ لألأ دي كانت سورة الفيل

سمع الله لمن حمده
ربنا ولك الحمد، أنا جعت، بس مش عارف أفطر إيه النهاردة؟
آه المطعم الجديد اللي كانوا بيتكلموا عنه إمبارح، بيقولوا عليه أكله حلو
بس هو في شارع إيه؟ لما أخلّص الصلاة أتصل بالتليفون أعرف العنوان

الله أكبر
هيا الساعة كام دلوقتي؟ زمانها أربعة وخمسة
على فكرة هيا الساعة التانية الجلد كنت حطيتها فين؟
آه.. ياإما في الدرج ياإما في الدولاب، دولاب ايه بس
ياأحمد ركز ياأحمد إنت بتصلي، أستغفر الله

الله أكبر
أهوه أنا مركز أهوه، إنظر لمكان السجود وركز في الأيات اللي بيقولها الإمام

الله أكبر
الشيطان ده أعوذ بالله بيخلي الواحد يسرح، مش هو الشيطان بيتسلسل في رمضان
يعني بيتسلسل تلاتين يوم، أيوه بس هو رمضان ده تسعة وعشرين ولا تلاتين؟
هو إبتدى إمتى؟ تعالى نحسبها كده..
هو كان يوم السبت في السعودية وفي مصر الأحد غريبة أوي الحكاية؟
طيب لو واحد على الحدود ورجل بره ورجل جوه يصوم ولامايصومش؟
أحمد.. شفت أهوه إنت رجعت تسرح تاني

الله أكبر
هو إحنا في الركعة الكام؟ يعني هانقوم ولا هانقرأ التشهد؟
لا دي التانية، طيب أقولك إتأخر شوية وشوف الي جنبك هايقوم يقف ولا يقعد يقرأ التشهد

الله أكبر
أيوه دي الركعة التانية، شفت بأه عشان سعادتك عمال تسرح
لأ خلاص أعوذ بالله من الشيطان الرجيم

الله أكبر
السجادة دي مريحة ولونها حلو، هيا سجادة ولا موكيت، لاموكيت بنسيج السجاد
آه على فكرة إبقى إفتكر تكنس السجادة اللي في البيت بالمكنسة
بس لازم أنضف كيس المكنسة عشان بقالي مده مانضفتوش

الله أكبر
الراجل اللي جنبي ده، رجليه بتزق في رجلي، طيب أحرك رجلي شوية
الله ده بيلزقها فيا تاني، أستغفر الله

الله أكبر
فيه صوت موبايل، الناس دي ليه مش بتقفل الموبايل ساعة الصلاة..
مش عارفين ان ممكن ده يخلي الواحد مايركزش في الصلاة مع
إن فيه يافطة محطوطة على الباب مكتوب عليها إغلق المحمول من فضلك
وعليها صورة موبايل عليه علامة إكس.. بس هو الموبايل ده كان نوعه إيه؟
بيتهيألي سيمنس.. هيا إيه الرنة دي؟ آه أنا عايز أبقى أغير الرنة
.
.
.
.

الله أكبر
الراجل اللي جنبي ده عمال يتحرك كتير، أستغفر الله مافيش خشوع خالص
أنا أهوه مش باتحرك
السلام عليكم ورحمة الله
السلام عليكم ورحمة الله
إيه هيا الصلاة خلصت!!!!!!!
السلام عليكم ورحمة الله
السلام عليكم ورحمة الله
أستغفر الله العظيم
!!!!!

.................................................. ........................................

اتمنى وصول المعنى للجميع
واعلم ايها الحبيب " إن فى الصلاة لشغلا "

ولعل بعض الناس لايصلون ويقولك
إنت عارف انا مابصليش ليه؟؟؟
تقولوا ليه؟؟؟؟؟
يقولك اصلى لما بصلى بسرح.......

ولكن المطلوب منا ان نجاهد الا نسرح
مش فاكر مره عاوز تنام مش عارف تنام
عملت ايه؟؟؟
سكت اخواتك....
وطفيت النور......
وقفلت الباب........
وحطيت المخده على دماغك........
كل دا جهاداً فى سبيل النوم
انا عاوزك تجاهد فى سبيل الله
انك تصلى وتحاول ماتسرحش بقدر الامكان
مع العلم بالصدق يقل السرحان

والله المستعان

والله جميله جدا وبتوصل معلومه جميله الى كل الناس

فعلا مواضيعك كلها هادفه
شكرا مها

بجد جاااااااامد الموضوع ده والاسلوب بتاعه

موضوع فعلا جميل وبعدين احمد ضيع الصلاه بسرحانه ده

وعلى فكره ده بيحصل كتير بس مش معنى كده اننا منصليش او نصلى ونسرح براحتنا لا احنا لازم نجاهد نفسنا على عدم السرحان فى الصلاه ونصلى فى خشوع وربنا يهدى الجميع شكرا ليكى يا مها وربنا يكرمك

بديع ما كتبت

روعة ما سطرتى

مقال مميز أختى الفاضلة

تقبلى تحياتى ومرورى

جميل جدا يا مها فى ميزان حسانتك ان شاء الله ويا رب الكل يستفاد من الموضوع ده علشان مفيش اجمل من الخشوع فى الصلاه تقبلى مرورى

جزيتى الجنه يا مها

الله يحفظك

وننتظر منكى المزيد