ده ببساطه كل اللي هتكتشفيه بعد الجواز

ده اللي انا عايزة اوضحه للبنات من خلال اللي شوفته في حياتي
بصي يا ستي اول حاجه بتكوني في حالك لغايه لما بييجي واحد تعجبيه وتخطفي قلبه وبعدها تحبو بعض ويفضل يقولك هتجوزك وفعلا تتجوزوا بصي بقي بيحصل ايه
اولا
مش هيعجبه شكلك لو لابستي اللبس اللي كنتي بتلبسيه قبل ما تتجوزوا مع انه كان عاجبه ايام لما كنتوا بتحبوا بعض مع ان لبسك ممكن يكون السبب الاساسي اللي حبك عشانه وجذبه ليكي ولو لاقاكي لابسه ضيق هيقولك انتي شايفاني كيس جوافه ولا قرطاس لب اجري غيري والبسي حاجه محترمه (خدي بالك هو بيعمل كده عشان يثبت للناس انك اهملتي في نفسك بعد الجواز)
ثانيا
هتكتشفي انه بيحب الاكل جدا وممكن ينكد عليكي لو كنتي تعبانه في يوم ومطبختيش او لو رجع من الشغل ولاقي الاكل لسه علي النار
ثالثا
هيفضل طول النهار يطلب طلبات كتير ويخليكي تقومي وتقعدي كل 5 دقايق وياريت علي كده وبس ده كمان عايزك تهتمي بنفسك (يعني بزمتك هتلاقي وقت من فين)
رابعا
هتكتشفي ان الحب ده كان كله كلام وبس وهتلاقيه اناني جدا ومش هيقولك كلام حلو كل اللي هيقوله عايز اكل و عايز شاي وقهوه ونسكافيه لغايه لما يحسسك انك في مطعم او في كوفي شوب
خامسا ودي اخر حاجه
هتكتشفي انه مكنش عايز زوجه ده كان عايز خادمه للست مامته لانه شافها تعبت من كتر شغل البيت واهه بالمرة يريحها من شغل البيت ويوفر فلوس الشغاله وطبعا هتبقي شغاله ومش هتاخدي اجازة غير لما تكوني غضبانه عند مامتك ولو قولتي لمامتك انه مخليكي خدامه لمامته هترد عليكي وتقولك" لاجل الورد يتسقي العليق و لاجل الصقر تخدمي ام قويق" طيب وانتي ذنبك ايه عشان تخدمي ام قويق يوووووووووو اقصد حماتك دي حتي كلمه الحماه من الحمي والعياذ بالله
ع العموم كفايه كده انا عملت اللي عليا اللهم اني بلغت اللهم فاشهد وعقلك في راسك تعرفي خلاصك

تسمحى لى اكون اول من يرد على موضوعك الجميل بس هيكون تعليقى على كل فقره بعد ازنك اول حاجه قبل ما اعلق ان اللى بيحب واحده بيشوفها اجمل واحده مش بلبسها الضيق ولا الميكاب بس بشخصيتها الحلوه وحبها ليه
مش هيعجبه شكلك لو لابستي اللبس اللي كنتي بتلبسيه قبل ما تتجوزوا مع انه كان عاجبه ايام لما كنتوا بتحبوا بعض مع ان لبسك ممكن يكون السبب الاساسي اللي حبك عشانه وجذبه ليكي ولو لاقاكي لابسه ضيق هيقولك انتي شايفاني كيس جوافه ولا قرطاس لب اجري غيري والبسي حاجه محترمه (خدي بالك هو بيعمل كده عشان يثبت للناس انك اهملتي في نفسك بعد الجواز)
ليه متقوليش انو خايف عليكى من عيون الناس ونصيحه البسى اللى هو عاوزك تلبسيه مادامتى بره شقتك لكن نوعى فى اللبس براحتك انتى ومعاه والمفروض انتى اللى تثبتيله عكس كده ماله لو احرجتيه بالزوق وقولتيلو اللى انته عاوزه هيكون يا حبيبى اللى عاوز تشوفنى بيه قولى عليه وانا البسه علشان خاطر عيونك كده يعنى
ده مش اكتشاف دى حقيقه لاننا كلنا عارفين ان اقرب طريق للراجل معدته وتسمحيلى ده تقصير منك انتى لو رجع ملقاش الاكل جاهز ده المفروض انو يرجع يلاقى الاكل خلص وميلاقكيش اساسا بهدوم المطبخ
هيفضل طول النهار يطلب طلبات كتير ويخليكي تقومي وتقعدي كل 5 دقايق وياريت علي كده وبس ده كمان عايزك تهتمي بنفسك (يعني بزمتك هتلاقي وقت من فين)
دى واظيفتك انك تلبيله كل طلباته وانتى وقتك لمين غيره وانتى وشطارتك انك تحسسيه ان كل حاجه هو عاوزها متاحه
هتكتشفي ان الحب ده كان كله كلام وبس وهتلاقيه اناني جدا ومش هيقولك كلام حلو كل اللي هيقوله عايز اكل و عايز شاي وقهوه ونسكافيه لغايه لما يحسسك انك في مطعم او في كوفي شوب
على فكره ده بايدك انتى انتى اللى تقدرى تخليه يكون احسن من ايام الخطوبه بالعكس ده كانت حاجات غير متاحه بالنسبه لكم وبقت خلاص متاحه والمفروض يكون فى تنوع فى اليوم ماله لو حسستيه انو فى كافيه شوب او حتى كباريه وممكن ساعات كمان فى فيلم عربى او اكشن لازم الحياه تكون متنوعه علشان الملل ميدخلش بينكم

هتكتشفي انه مكنش عايز زوجه ده كان عايز خادمه للست مامته لانه شافها تعبت من كتر شغل البيت واهه بالمرة يريحها من شغل البيت ويوفر فلوس الشغاله وطبعا هتبقي شغاله ومش هتاخدي اجازة غير لما تكوني غضبانه عند مامتك ولو قولتي لمامتك انه مخليكي خدامه لمامته هترد عليكي وتقولك" لاجل الورد يتسقي العليق و لاجل الصقر تخدمي ام قويق" طيب وانتي ذنبك ايه عشان تخدمي ام قويق يوووووووووو اقصد حماتك دي حتي كلمه الحماه من الحمي والعياذ بالله
ع العموم كفايه كده انا عملت اللي عليا اللهم اني بلغت اللهم فاشهد وعقلك في راسك تعرفي خلاصك
لا طبعا انتى لازم تخدمى حماتك حتى لو هو مش عاوز كده لان انتى اكيد ليكى اخوات ولاد واكيد عاوزه مرات اخوكى تشيل امك من على الارض شيل وليه تسميها ام قويق ليه متعتبرهاش امك التانيه يا شيخه ده بيقولو دعوه الحما فى السما ودعوه الام فى الكم

وتسمحيلى انتى شايفه الجزء الوحش فى الجواز اللى ممكن تتجاهليه لكن مش شايفه اهم حاجه فيه وهو الاستقرار والحب والحنيه ونصك التانى سواء فى دنيتك او فى دينك متزعليش منى لو كنت طولت عليكى بس هى دى وجهه نظرى ونصيحتى وانتى حره

شكرا وتقبلى مرورى

نايس توبيك

ع فكره كنت بردوا هرد على كل فقره
بس تقريبا موئه قالت كل حاجه
نايس توبيك

موئه
ميرسي ليكي وانتي تطولي براحتك يا قمر بس اا مش شايفه الجزء الوحش ولا حاجه انا شايفه الواقع كل اللي متجوزين حوليا بيعانوا نفس المعاناه وتقريبا معظم قرايبي حصلهم بينهم طلاق بسبب الحاجات دي ع العموم راي حضرتك صح ومقدرش اقول غير ربنا يوفقك ويسعدك

امير روما ميرسي لمرورك

نور ميرسي لمرورك نورتي التوبيك

لا بساطة كل الحاجات دى وبساطة بس انا عايزة اقو للك حاجة اننا عارفيين ان كل دة هيحصل وطبيعى جدا وانتى هتتقبلى دة بصدر رحب مادام الحب بينكم موجود
بس

بارك الله فيكى

جاسمين شكلك مجربه او بتخدعينا
بس اكيد مش كل الرجاله زى بعضها يمكن انتى بتكلمى عن الرجاله الغلط
بصراحه موئه ردت على كل حاجة كنت حقولها
موفق باذن الله

انا بشكر موئة على الرد ده
ثانيا زي ماقالت شيماء مدام الحب موجود اكيد كل حاجة حتكون بسيطة وتتحل
وادعولنا نخلص الاول وبعدين نفكر في الجواز والهم

ياسمين بالراحه شويه انتي صاحبتي الانتيم وعارفه كويس انك مبتحبش الرجاله خالص ومعظم كلامك عندك فيه حق بس انتي نسيتي اهم حاجه وانك في يوم من الايام هتتجوزي يبقي بقي لازم تتغيري شويه

نايس توبيك

هههههههههههههههههههه

انا اوافق موئه فى الراى وكمان فى ازواج كتير بقدروا زوجاتهم خاصة لما تكون الزوجة قادرة على امتصاص غضب زوجها