يعنى ايه تربية رياضية جامعة جنوب الوادى

[center][b]

الموضوع دا انا شايفه مهم جدا قبل اى موضوع اخر وقبل اى موضوع منشور فى قسم التربية الرياضية

يعنى ايه تربية رياضية

الكل فاكر وانا كنت واحد منهم بس قبل ما ادخل الكليه
الكل فاكر انه الكلية محتاجه اقل حاجه جسم ومحتاجه انك تكون تعرف تلعب كوره وليك كمان فى الرياضه واخبارها وبتتابع وهكذا وللأسف الكليه غير مرتبطه تماما بالمعانى دى
كتير من اصحابى ما يعرفوش قوانين كرة القدم وبالعربى كده ما يعرفوش يلمسوها زى ما بنقول

كلية التربية الرياضية عمرها ما هتخرج لاعب الا فى حاله انه الطالب دا بيلعب فى منتخب الكلية او الجامعه وفى اى مدرب فى اى فريق شافه واشتراه من الكليه او كده يعنى وبيحصل وحصل
لكن فى الاساس الكلية عمرها ما بتخرج لاعب

احنا بندرس فى الكلية ازاى تطلع تدرس الناس الرياضه والالعاب الرياضية وازاى تدربهم وازاى تبقى ادارى فى مجال الرياضه

يعنى بالعربى الكلية بتطلع يا اما مدرب فى اللعبه اللى انت بتتخصص فيها او ادارى فى مجال الرياضة والتخصصات الرياضية وهكذا او بتطلع مدرس فى مجال التربية الرياضية

اغلب الناس تقدر تاخد دورات مثلا سواء تدليك او اصابات ملاعب او تدريب كرة قدم او غيره بس طبعا بيكون الاولويه لبتوع التربية الرياضية
لانهم الاجدر
لاننا واقل سبب بندرس كل حاجه عن كل لعبه تاريخها وقوانينها وطرق لعبها واخطائها وازى تدربها وازاى تدرسها

الاقسام اللى فى الكلية الى الان
التدريب الرياضى
التدريس
الادارة
وطبعا قسم علوم الصحه لسه ما اتفتحش وطبعا علوم الصحه بتخرج فى شغل العلاج الطبيعى واصابات الملاعب وكده يعنى
وفى كمان قسم العلوم التربوية والنفسة ولسه ما اتفتحش ودا ليه علاقة بالناحية النفسية والتربية الرياضية

الالعاب اللى بندرسها
قدم - يد - سله - طايره - تنس طاوله - ( وتنس ارضى لسه ملوش ملعب ) - ملاكمة - مصارعه - جودو - كارتيه - مبارزه ( وما عندناش الا سلاح شيش) - ماده اسمها التمرينات الرياضية ودى ليها علاقة بالتمرينات الرياضيه اللى فى الاحماء والتسخين والاعداد البدنى وكمان ليها علاقه بالتوافق العضلى العصبى - رفع اثقال - مسابقات المضمار - السباحة - مسابقات الميدان - الهوكى - )
والبنات بقى بيدرسوا كل دا الا اختلافات فى العاب معينه فهما بيدرسوا مثلا ....ايقاع حركى - جمباز ايقاعى - التعبير الحركى ) وعلى فكره اغلب الالعاب دى احنا بندرس اساسياتها وكل الالعاب دى مقسمه على اولى وتانيه وفى ثالثه ورابعه بقى بندرسها بالتفصيل الممل

وكمان احنا بندرس مواد نظرية كتير مش هذكر منها الا التشريح والفسيولوجيا وعلم النفس والادارة والفلسة والانجليزى والاحصاء والترويح الرياضى وعلم اجتماع وطبعا كل المواد دى فى اطار الرياضة بس لان كل المواد دى ليها علاقة بالرياضة وطبعا فى مواد كتير تانية انا نسيتها ومش متذكرها زى علم الحركة وطرق التدريس والتدريب الرياضى او بمعنى اصح كل الالعاب دى احنا بندرسها عملى ففى الملاعب وبندرسها نظرى بجانب المواد النظرى التانيه ....

وطبعا سنه ثالثه ورابعه دول مختلفين تماما لاننا فى سنه ثالثه بنختار اربع العاب نتتخصص فيهم اتنين منهم العاب فردية واتنين منهم العاب جماعية طبعا بجانب المواد النظرى اللى بتزيد فى ثالثه ورابعه وبعدين فى سنه رابعه احنا بنختار لعبه فرديه ولعبه جماعيه واحده من اللى اخترناهم فى ثالثه ونتخصص فيهم


عندنا معسكرين واحد فى سنه اولى وبيتحدد يا اما بيكون معسكر خدمى او كشفى او بس غالبا بيبقى خدمه عامه وفى سنه تالته عندنا معسكر تانى من المفروض انه بيبقى خارج الجامعه يا اما فى حلوان او اى بلد تانى بس بما انه الكليه لسه جديده فلسه بيتاخد فى الجامعه ....

الكل دايما يقول تربية رياضية يعنى ناس وحشه يعنى ويعنى ويعنى بس اللى الناس ما تعرفهوش انه احنا ناس كويسين جدا وزينا زى اى كلية تانى بس المشكله اننا بنتعب اكتر من اى كلية وليل نهار قاعدين فى الشمس فى الملاعب علشان كده اغلبنا محروق من الشمس وانا منهم

انا حبيت اوضح بس انه مش لازم اللى فى تربية رياضية يبقى جسم او كده يعنى لانها بالبساطه هى بتخرج يا اما مدرب اوا مدرس او ادارى فى مجال التربية الرياضة

انا طولت قوى عليكووو
حلمى انا اكمل واخد دورات تدريب كرة قدم اللى هما خمس مراحل بس دايما الدنيا بتقف ضدى وبتحط عواقب وعواجز كتير زى السنه دى
ادعولى اكمل فى مجال التدريب الرياضى فى القدم وابقى مدرب معروف فى يوم من الايام

ك/محمد

ارجو من الجميع زيارة المدونه بتاعتى ويقولى ايه رأيه ويشارك فيها ...اسمها تبارك أحلامى

www.alltime4htm.blogspot.com

أهداف الكلية


- إعداد معلم التربية الرياضية لمراحل التعليم المختلفة.

- إعداد المدرب الرياضى للأنشطة الرياضية.

- إعداد الأخصائى فى مجالات الإدارة الرياضية.

- إعداد وتأهيل أعضاء هيئة التدريس والباحثين والمتخصصين والخبراء فى المجال الرياضى.

- إجراء البحوث والدراسات العلمية فى مختلف مجالات التربية الرياضية التى تسهم فى خدمة المجتمع وتنمية البيئة.

- رفع المستوى المهنى والعلمى للعاملين فى ميدان التربية الرياضية وتعريفهم بالاتجاهات التربوية الحديثة

- تقديم المشورة العلمية للهيئات الحكومية والأهلية فى مجالات التربية الرياضية والتعاون فى دراسة القضايا الرياضية لتحقيق الأهداف المشتركة التى تسهم فى تطوير التربية الرياضية.

- تبادل الخبرات والمعلومات مع الهيئات والمؤسسات التعليمية والثقافية المصرية والعربية والدولية والتعاون معها فى معالجة القضايا الرياضية المشتركة.

-يتم توزيع الطلاب على التخصصات فى المرحلة التخصصية وفقاً لما يقرره مجلس الكلية من ضوابط بناءاً على مقترحات مجالس الأقسام

الكلام دا علشان كل اللى شايفين نفسهم حابين مجال التدريب سواء فى اى لعبه وممكن يكملوا ويبقوا مدريبن فى يوم من الايام او كمان اى وظائف تبع وزارة الرياضة واقل ما فيها انك تبقى مدرس ((طبعا الكلام دا للى لسه فى ثانوية وكمان للى فى الجامعه وما يعرفش حاجه عننا

ملحوظة انت فى كتير ما يعرفش يلعب كوره وبيدخل الكلية وبيتعلم الاساسيات اللى بيها يستطيع انه يدرب

وكمان انت ممكن تدخل الكلية وتعجب باى لعبه انت عمرك ما سمعت عنها او لمسة الادوات بتاعتها زى مثلا المبارزة او غيرها وفى الاخر تحبها وتكمل فى مجالها فى التدريب

كفايه اننا بنبقى ملمين بكل حاجه عن كل لعبه تاريخ وقوانين وطرق لعب وادوات وشكل ملعب كل لعبه وقوانينه وابعاده وحاجات كتير
وأظن انا عامل موضوع بكل لعبه تقريبا ولمتها بأختصار شديد للى عايز يعرف اكتر ....

موضوعك جميل

عرفت الجميع بالكليه كويس
نسيت تقول اننا اللى من الجامعه بيعمل عروض ويتعب ونقدمها فى افتتاح الخماسيات ونشرف الجامعه
وكمان احنا اللى بنعمل العروض فى العروض المتخصصه اللى بتتعرض فى القاهرة واللى اخدنا عليها مراكز
نسيت اننا الاساس فى كل حاجه خاصه بالرياضه فى الجامعه وان اللى بيميزنا عنهم بالزى الرسمى بتاعنا
وكمان العميد بتاعنا منسق الانشطه الطلابيه على مستوى الجامعه يعنى احنا اساس كل الانشطه
وان فى كل نشاط لازم يذكر اسم الكليه
كمان احنا تعبنا لحد ما بقينا كليه كنا الاول قسم فى كليه تربيه وبقينا كليه تربيه رياضيه منفصله ولها مبنى لوحدها خاص بيها
بالاضافه للاقسام اللى زكرتها
فى الماجستير الاقسام هيا
الادارة- المناهج وطرق التدريس- علوم الصحه- والعلوم النفسيه والاجتماعيه- التدريب الرياضى

مرة كمان بشكرك على ما قدمت
وربنا يوفقك

فعلا انا نسيت
بس انا كان كل قصدى اعرف الناس اللى ما تعرفش يعنى ايه كلية التربية الرياضية وايه الفرق بينها وبين اى نادى

...............

فى حاجه تانى الجامعه كل اول سنه دراسيه بيكون اغلب الرصيف بتاعها مدهون جديد وكمان الشجر الطويل بيتظبط وحاجتا كتير بتتعمل فى المعسكر ....... وفى الاخر الناس بتجى تلاقى الجامعه مظبطه كل اول سنه وما بيسألوش مين اللى عمل كده


طبعا موضوع المعسكر دا ممكن الناس تفهمه غلط وتقولك لالالالالالالا دول يا عم بيكنسوا وينضفوا ويتعبوا وكده يعنى

بس اللى الناس ما تعرفهوش انه المعسكر دا بينتعلم منه حاجات كتير وكتير قوى كمان من قياده ومن اعتماد على شخصيته وصناعه شخصيه لنفسك وكمان من انك بتتقرب من كل اصحابك اللى فى الكليه واللى ممكن تتعرف عليهم فى المعسكر
ونسينا انه المعسكر فيه انشطه ترفيهيه كتير اكتر من الخدمه العامه وكلام كتير تانى عنه
بس انا مش عارف اوصله.......

اخى انتا وصلت الموضوع جامد جدا
تسلم ايدك بجد
بس يارب تكون رسالتنا وصلت

شكرا لكل اللى اهتموا بالموضوع وكمان شكرا لكل القرأ اللى ما حاولوش يعملوا تعليق

هكمل