خذوا الحكمة من سائقي التكاتك ..!!

هل لاحظت يوما كمية الجمل اللى بتكون مكتوبة
على جدران الميكروباصات أو التكاتك ..
يا ترى هذه الجمل تعبر عن شخصية سائق التوك توك
أم أنها مجرد جمل عابرة ! ..
عند التدقيق فى كثير من الجمل المكتوبة على مؤخرة أى توك توك
سوف تجد أنها تعبر بصدق عن واقع المجتمع وعن سلوك الناس ..
حتى ولو كان هذا السلوك خطأ ..
والأن تعالوا وخذوا الحكمة من افواه سائقى التكاتك .
خذوا الحكمة سائقي التكاتك ..!!
ماتجريش ورايا أختك راكبة معايا

فى كتاب ( تراث العبيد فى حكم مصر )
لمؤلف مجهول رفض أن يطبع إسمه على غلاف الكتاب
قال إن المماليك هم من إفتكسوا حكاية إنهم يشتموا الناس بأمهاتهم ..
وذلك لأن الأم عرض الرجل ..
ونظراً لأن المماليك كانوا مجهولين النسب فمن باب النفسنة كانوا بيشتموا
الناس بعرض أمهاتهم ..
وفى التكاتك أضيف للشتيمة بالأم كذلك الأخت ..
عندما قرأت هذه العبارة على مرخرة توك توك شعرت بالخوف
خوف من هذا المجتمع الذى ضاعت فيه الشهامة والرجولة
خذوا الحكمة سائقي التكاتك ..!!
وهى معاك برضه لسه حبيبتي

زمان ..
موش زمان أوي يعنى ..
كان لو واحد انتهت علاقة حب بينه وبين حبيبته
وخصوصا لو حبيبته دى تزوجت ..
كان لا يسمح لنفسه مجرد التفكير فيها او الكلام عليها
ويقول فى نفسه انها اصبحت فى عصمة راجل ..
ما الذى جرى لأخلاق هذا الزمن حتى تسجل مثل هذه العبارات على التكاتك ..
ليشاهدها الألاف بدون أى حياء !

خذوا الحكمة سائقي التكاتك ..!!
سلام يا بلد الكلام

سائق التوك توك الذى إفتكس هذه العبارة
لا يعكس حاله وحال اصحابه من سائقي التكاتك وفقط ..
دى حال المصريين كلهم ..
كل المصريين بيقولوك " دى بلد الكلام " ..
لكن شغل الكلمنجية السائد فى البلد ده أساسه ايه ..
اساسه الحكومة اللى مارست خداع الناس من أول ثورة يوليو لغاية
دلوقت من ايام اذاعة صوت العرب من القاهرة
" واسقطنا مليون طائرة للعدو " ..
ولا أساسه الناس اللى اصبحت لا تملك إلا الكلام
حتى ولو كان الكلام ده مايساويش !
خذوا الحكمة سائقي التكاتك ..!!

عشم مات المعاملة خد وهات

هل العشم مات بين الناس ؟! ..
سأل الدكتور جلال أمين فى كتاب له عن التغيرات التى حدثت
فى مجتمعنا بعنوان عريض على غلاف الكتاب
وهو " ماذا حدث للمصريين ؟ " ..
وهذا الكتاب نجح بسبب عنوانه ..
لأن الكل يسأل ماذا حدث للمصريين ..
والغريب ان كل واحد بيسأل دون أن يبحث جوه نفسه فى المقام الأول ..
هل ظروف مجتمعنا الصعبة ممكن فعلاً تقضى على كل المعاني النبيلة والجميلة
اللى كانت موجودة ..!

خذوا الحكمة سائقي التكاتك ..!!
خليك جرىء وعوم فى الغريق

قد تكون تلك الجمل من العبارات
التى تدعوا إلى الاقدام والشجاعة والكلام ده ..
لكن الحقيقة ان الجمل دى وأشكالها هى تعبير عن
روح الفهلوة السائدة فى المجتمع ..
فقطاع عريض من الشعب يتخذ الفهلوة مذهباً ..
عايز يعمل كل حاجه بالفهلوة ..
عايز يعمل فلوس من غير ما يشتغل ويتعب
ولكن عن طريق الفهلوة ماشى ..
حتى الحب أصبح فهلوة " ازاي تعلق البت دى " ..
حتى التعليم اصبح فهلوة
" ازاى انجح واجيب تقدير من غير ما افتح الكتاب " ..
الفهلوة بقت جزء لا يتجزأ من شخصية المجتمع .

خذوا الحكمة سائقي التكاتك ..!!
عبقري فى زمن طري

حكاية الإعتداد بالنفس بشكل مبالغ أوي
بتلاقيه موجود فى المجتمع ..
وفى أوقات كثيرة تلاقى الإعتداد ده فى ألأونطة ..
فتلاقى الأخ العبقري فى زمن طري ده ميعرفش الالف من كوز الدرة ..
وتلاقى اللى بيشتغلك وبيقولك انا سويت الهوايل مع البت بتاعتي
كان بيحلم حلم تقيل شوية ..
وتكتشف ان صاحبك اول الدفعة طالع بمدتين..
عادي خالص جداً .
خذوا الحكمة سائقي التكاتك ..!!
الكار ده موش كارنا يا رب صبرنا

اعتقد إن ده تعزية من سائق التوك توك
لكل شاب خريج جامعة ووجد نفسه سائق ميكروباص
او حتى سائق توتوك او بيقدم شاي وقهوة على أى كافية على البحر أو النيل ..
ولأن هناك مبدأ عام أن حب ما تعمل حتى تعمل ما تحب
يبقى يا رب صبرنا .
خذوا الحكمة سائقي التكاتك ..!!

متبصش لعجلها لتجيب أجلها

الإيمان بوجود الحسد ده شىء اساسي لا خلاف فيه ..
لكن احيانا بيتحول الخوف من الحسد لمرض ..
وبيبقى الانسان خايف على كل حاجة حلوة عنده ..
المفهوم ده تلاقيه مكتوب على كثير من التكاتك ..
لكن تفتكر ممكن حد يحسد توك توك ماشى !!!!!!!
خذوا الحكمة سائقي التكاتك ..!!
عشت عصفور دبحوني

مع تغير المجتمع أصبح الطيب واللى فى حاله بياخد على قفاه ..
أصبحنا فى مجتمع لازم تعيش فيه وانت مربي ظوافرك علشان تقدر بس تعيش ..

خذوا الحكمة من سائقي التكاتك ..!! 1310406502_xx

نايس توبيك

موضوع فى غاية الروعه

موضوع جميل

تسلم عمرو
***********************

ميرسى لمروركم

» الحكمة من إبقاء العين مفتوحة أثناء السجود.