قصيدة عمتى يامنه لعبد الرحمن الأبنودى

بسم الله الرحمن الرحيم
النهارده أنا جيبالكم قصيدة عمتى يامنه لعبد الرحمن الأبنودى
ياااااااااااااااااااااااااارب تعجبكم
والله وشبت ياعبدالرحمن
عجزت ياواد؟
ماسرع..؟
ميته وكيف ؟
عاد اللي يعجز في بلاده
غير اللي يعجز ضيف!!
هلكوك النسوان؟
شفتك مره فى التلفزيون
ومره وروني صورتك في الجورنان
قلت : كبر عبدالرحمن!
أمّـال أنا على كده
مت بقالى ميت حول!!
والله أنا خايفة ياولدي القعدة تطول
مات الشيخ محمود
وماتت فاطنة ام قنديل
واتباع كرم ( اب غبان )
وانا لسه حية
وباين هحية كمان .. وكمان!!
عشت كثير ..
عشت إلـحد ما شفتك عجزت يا عبد الرحمن
وقالولي .. قال : خلفت!!
وانت عجوز خلفت ياواد ؟!!
وبنات كمان ..؟
امال كنت بتعمل ايه
طيلة العمر اللي فات؟
دلوقت مافقت؟
وجايبهم دلوك تعمل بيهم ايه ؟
على كلٍ ..
أهي ريحة من ريحتك ع الارض
يونسوا بعض…
ماشي ياعبدالرحمن ..!
اهو عشنا وطلنا منك بصة وشمة .
دلوك بس ..
ما فكرت فـ ( يامنه ) وقلت ( ياعمة )؟
حبيبي انت ياعبدالرحمن
والله حبيبي .. وتتحب
على قد ما سارقاك الغربة
لكن ليك قلب
مش زي ولاد الكلب اللي نسيونا زمان !!
حلوه مرتك .. وعويلاتك ؟
والا شبهنا ؟
سميتهم ايه؟
قالولي : ( أية .. ونور)
ماعرفتش تجيب لك حتة واد ؟
والا اقولك:
يعني اللي جبناهم..
نفعونا في الدنيا بإيه ؟
غيرش الانسان مغرور!!
ولسة يامنه حتعيش وحتلبس
لما جايب لي قطيفة وكستور؟
كنت اديتهمني فلوس
اشتري للركبة دهان
أ بـا ي ما مجلع قوي يا عبدالرحمن
طب ده انا ليا ست سنين
مزروعة في ضهر الباب
لم طلوا عليا احبة ولا اغراب
خليهم .. ينفعوا .. اعملهم اكفان
كرمش .. وشي !!
فاكر يامنه .. وفاكر الوش؟
اوعى تصدقها الدنيا
غش فـ غش!!
اذا جاك الموت ياولدي
موت على طول
اللي تخطفوا فضلوا احباب
صاحيين في القلب
كأن ماحدش غاب
واللي ماتوا حته .. حته ونشفوا
وهم لسه حيين
حتى ( سلام عليكم)
مش بتعدي من بره الاعتاب!!
اول مايجيك الموت … افتح
اول ما ينادي عليك .. اجلح
انت الكسبان…
اوعى تحسبها احساب
ولا واد .. ولا بت
ده زمن .. يوم مايصدق .. كداب!!
سيبها لهم بالحال والمال وانفد
اوعى تبص وراك
الورث تراب
وحيطان الايام طين
وعيالك .. بيك مش بيك عايشين!!
يوووووه يازمن
مشوار طولان..
واللي يطوله يوم عن يومه ياحبيبي
كداب!!
*******
الدواء عاوزاه لوجيعة الركبه
مش لطوالة العمر
اوعى تصدق الوانها صفر وحمر
مش كنت جميلة ياواد…
مش كنت .. وكنت وجدعه
تخاف مني الرجاله
لكن فين شفتوني
كنتو عيال!!
بناتي ( رضية ) ( ونجية ) ماتوا وراحوا
وانا اللي قعدت
طيب يازمان!!
اوعى تعيش يوم واحد بعد عيالك
اوعى ياعبدالرحمن
في الدنيا وجع وهموم اشكال الوان
الناس مابتعرفهاش
اوعدهم
لو حتعيش بعد عيالك ماتموت
ساعتها بس .
حتعرف ايه هو الموت
اول مايجي لك نط
******
لسه بتحكي لهم بحري
حكاية ( فاطنه وحراجي القط )؟
آ باي .. ما كنت شقي وعفريت
من دون كل الولدات
كنت مخالف…
براوي
وكنت مخبي في عنيك السحراوي
تمللي حاجات
زي الحدايه..
تخوي الحاجه وتطير.
من صغرك بضوافر واعره
ومناقير !!
بس ما كنت كداب
واديني استنيت بالدنيا
لما شعرك شاب!!
*******
قدم البيت
اتهدت قبله بيوت وبيوت
واصيل هوه
مستنيني لما اموت
حاتيجي العيد الجاي
واذا جيت ..
حاتجيني لجاي؟
وحاتشرب مع يامنه الشاي؟
حاجي ياعمه ..
وجيت…
لا لقيت يامنه ولا البيت!!
منقوووووووووووووول
والسلام عليكم ورحمة الله وبركاته
[b]

جميله يا صفـآء تسلم آيدك
بس انا قربت آتعمى عقبـآل ما خلصتهـآ ههههههههههههههههههههههههههههههههههههه

آلعفـو يآ صفـآء موضوعك كبير ويـآريت تكبرى الخط فعـلآ
وبعدين سـوآء صفـآء بنت آلآسـلام
كلهمٍ بنت قمرآيه زيك كده ومنورآنآ