اسئله عن المحاسبه في الانترفيو

الاسئله المحتمله في مقابلات التوظيف(الانترفيو) مع اجااااااااااباتهاااااااااااااا

1- ايه الفرق بين الميزانية والمركز المالي ؟؟؟

طبعا سؤال سهل ..

المركز المالي : هو قائمة توضح أصول وخصوم المنشأة ... يعني حقوق والتزامات المنشأة ... يعني ايه اللي للمنشأة وايه اللي عليها ... في أي يوم في السنة .

يعني في أي يوم نجي نروح عاملين موقف للمنشأة عارفين ايه اللي ليها وايه اللي عليها ونحطه في صورة قائمة تبقى دي اسمها المركز المالي.

طب ايه هي الميزانية العمومية ؟

هي : مركز مالي .....
ايه مركز مالي ... يعني أصول وخصوم المنشأة ... حقوق والتزمات المنشأة

طب ايه الفرق ؟ الفرق ان الميزانية العمومية هي مركز مالي للمنشأة في نهاية السنة المالية. يعني في نهاية السنة المالية في آخر يوم في 31/12/2006 مثلا بنعرف حقوق والتزامات المنشأة فتبقى اسمها الميزانية العمومية

2-ايه الفرق بين الميزانية والموازنة ؟؟؟

الميزانية العمومية : هي زي ما قلنا عبارة عن قائمة توضح أصول وخصوم المنشأة ... حقوق والتزمات المنشأة في نهاية السنة المالية وبتكون معها الحسابات الختامية ( حـ / المتاجرة وحـ/ الأرباح والخسائر ) اللي بيوضحوا نتيجة نشاط المنشأة من ربح أو خسارة عن الفترة المالية السابقة .

يعني ايه ؟؟! يعني ان الحسابات الختامية هي اللي بتوضح مصروفات السنة اللي فاتت الفعلية وايرادات السنة اللي فاتت الفعلية لكن الميزانية العمومية توضح حقوق والتزامات المنشأة في نهاية السنة .

طب ايه هي الموازنة ؟؟؟

الموازنة التقديرية : هي عبارة عن تقدير لايرادات ومصروفات المنشأة للسنة القادمة أو لعدة سنوات قادمة.

3-ايه الفرق بين المصروفات الايرادية والمصروفات الرأسمالية ؟؟؟

أولا نحب نعرف ايه هو المصروف :

هو عبارة عن نفقة ( يعني --> فلوس بادفعها ) في سبيل الحصول على ايراد.

يعني بادفع مثلا ايجار للمحل ... ليه ؟؟ علشان أبيع منه واحصل على الايراد.
بادفع مثلا أجور ومرتبات للعاملين ... ليه ؟؟ علشان ينتجوا واحصل على الايراد.

يبقى المصروف بادفعه في سبيل الحصول على الايراد.

المصروف الايرادية : هو مصروف يحقق الايراد في نفس السنة المالية .

المصروف الرأسمالي : هو مصروف يحقق الايراد في عدة فترات مالية ويؤدي إلى زيادة الطاقة الانتاجية للمنشأة .

يعني مثلا : مصروف الأجور والمرتبات بتدفع كل شهر عن عمل الموظفين عن الشهر يعني كل شهر بيأخدو مرتباتهم فيها بيدخلوا للمنشأة ايراد في نفس الشهر ..... يبقى مصروف الأجور والمرتبات مصروف ايرادي .

ومثلا : م الدعاية والإعلان ... الشركة مثلا عملت حملة اعلانية ضخمة استفادت بها المنشأة على كذا سنة .. يعني ساعدت على تحقيق الايرادات خلال عدة سنوات ... يبقى المصروف ده مصروف رأسمالي .

مثال تاني :-

مصروف الصيانة ... عملنا صيانة للآلات والمعدات للمنشأة علشان ترجع تنتج تاني يبقى المصروف ده مصروف إيرادي .

طب لوجينا عملنا صيانة للألات مش علشان ترجع تشتغل تاني بس ولكن تزيد طاقتها الانتاجية ... يعني بدل ما تنتج مثلا عشر وحدات خليناها تنتج 15 وحدة يعن زودنا كفائتها الانتاجية والزيادة دي مش هتكون في أول سنة بس ؟؟ لا طبعا ... في السنين المتتالية اللي بعديها . يبقى المصروف ده في هذه الحالة مصروف رأسمالي.

4-ما الفرق بين المخصص والاحتياطي ؟؟

أولا : نحب نقول لكم على حاجة الأول ...

أي منشأة صاحبها بيعملها علشان يكسب من ورائها أرباح يستفيد بيها .... وعلشان صاحب المنشأة أو الشركة مش يفضل يسحب فلوس من الشركة لحد ما تتعدى رأس ماله ... حددنا في المحاسب جزء أو ( حساب بمعنى المحاسبين ) هو ده بس اللي يسحب منه .... لأن بعد كده هيبدأ يستهلك رأسماله في الشركة .... وطبعا لو فضل على الحالة دي (( يعني يسحب من رأسماله )) هيفاجأ إن الشركة مش بتاعته بقت بتاعة الدائنين اللي عاوزين حقوقهم .... وبالتالي هيعلن افلاسه.

علشان كده قلنا لازم نخلي حساب خاص للأرباح هو بس اللي يتسحب منه الفلوس .

يعني ممكن نعرف الأرباح : على أنها الزيادة في حقوق الملكية لأصحاب المنشأة .
وأيضا ممكن نعرف الخسائر : على أنها النقص في حقوق الملكية لأصحاب المنشأ’ة.

نرجع لموضوعنا ... الفرق بين المخصص والاحتياطي

المخصص والاحتياطي ... الاثنين مبلغ يستقطع من الربح لمواجهة خسارة متوقعة .

واحنا طبعا عارفين مبدأ الحيطة والحذر : اللي هو إنه ينبغي على الشركة تحطاط لكل خسارة متوقعة وتحذر من كل إيراد غير محقق.

الفرق إن المخصص بيتم تكوينه في حالة تحقق ربح أو تحقق خسارة يعني جبري ( فرضته مبادئ ومعايير المحاسبة ).
لكن الاحتياطي لا يتم تكوينة إلا في حالة وجود أرباح فقط وبيكون اختياري على المنشأة ( إلا البنوك وشركات التأمين).

فرق تاني إن المخصص بيكون لمواجهةخسارة حقيقة أو متوقعة بنسبة كبيرة ( مثل مخصص الاهلاك ).
أما الاحتياطي بيكون لمواجهة خسارة متوقعة ولكن احتمال وقوعها ضئيل (مثل مخصص ارتفاع أسعار الأصول الثابتة ) يعني بيكون لتدعيم المركز المالي.

5-ما هو الحساب الذي لا يظهر ضمن ميزان المراجعة ؟؟

أولا : لازم نعرف الحسابات اللي بتظهر في ميزان المراجعة بتظهر ليه ؟؟! لأن ميزان المرجعة محصلة وملخص لعمليات سابقة عليه هي مراحل نظام المحاسبة اللي هي :-

تجميع الأحداث المالي ---------> تسجيل الأحداث المالية في قيود يومية --------> تبويب الأحداث المالي في حـ/ الأستاذ ------------> تليخص اعمليات السابقة في ميزان المراجعة

طب ايه هو الحساب أو البند الذي لا يمر بكل هذه المراحل .... ؟؟؟

بضاعة آخر المدة .... لأنها تكون نتيجة جرد وليس نتيجة قيد يومية ، يعني بيتم جرد البضاعة وتقييمها ثم وضع قيمتها مرة دائن في حـ/ المتاجرة ومرة مدينة في الميزانية العمومية تحت بند الأصول المتداولة.

الموضوع منقول للامانه بس لسه في اسئله تاني لو عجبكوا الموضوع قولولي وانا ان شاء الله اكمل الباقي

الله عليك يا هيما,,, هي ده المواضيع ولا بلاش

موضوع جميل جدا ,, ومفيد جدا جدا

في انتظار المزيد... تقبل مروري اخي الكريم

THE KING كتب:: الله عليك يا هيما,,, هي ده المواضيع ولا بلاش

موضوع جميل جدا ,, ومفيد جدا جدا

في انتظار المزيد... تقبل مروري اخي الكريم

نورت التوبيك بحضورك يا كينج وان شاء الله هكمل بقيت الاسئله بس مستني راي بقية الاعضاء

موضوع يهم كل اللى فى كلية التجاره اللى بيهتمو بمستقبلهم
ربنا يوفقك ونزل باقى الموضوع
اكيد باشكرك على مجهودك المفيد ده

موضوع مهم والله كلنا بنسمع عن الانتر فيو لكن اية هو الى بيحصل جوا والاسئلة بتعتوا اللله واعلم

zizi zl كتب:: موضوع يهم كل اللى فى كلية التجاره اللى بيهتمو بمستقبلهم
ربنا يوفقك ونزل باقى الموضوع
اكيد باشكرك على مجهودك المفيد ده

ميرسي يازيزي علي مرورك الراااااااااائع وان شاء الله اكمل باقي الموضوع علشان يبقي كامل cheers

madoo_madoo16 كتب:: موضوع مهم والله كلنا بنسمع عن الانتر فيو لكن اية هو الى بيحصل جوا والاسئلة بتعتوا اللله واعلم

دي يا عمرو اسئله احيانا بتسئلها لما تروح تقدم في شركه ولا حاجه بس انت برضه ماقلتليش الموضوع عجبك ولا لا؟

لا والله الموضوع بجد عجبنى بس تسمحلى اقولك يا اسد
اوك يا اسد
اسئله عن المحاسبه في الانترفيو Get-8-2009-Giantup_CoM_9tmb4pc6

شكرا ليك يا ifimtm يا جامد علي الموضوع الجامد

mohammed Aboud elrawy كتب:: شكرا ليك يا ifimtm يا جامد علي الموضوع الجامد

تسلم علي مرورك ياراوي يااجمد مشرف في المنتدي وبسسسسسسسسسس

» اسئله عن المحاسبه..............الجزء ال2
» المحاسبه قديمه جدا من الستينات
» اسئله للبنات
» اسئله عن الحب والرومانسيه
» 3 اسئله ليس لهم حل وهذا هوا الحل