ايام زمان.....وياريت لو ترجع بينا تاني ايام زمان

بسم الله الرحمن الرحيم


فاكرين ايام زمان !! كانت قد ايه جميله و مليئه بالذكريات...بنفتكر منها الحلو و بنفتكر منها الصعب....

بننسي مع الوقت .......بس لما الصدفه ترجعنا ليها بنحن من قلبنا .... لناس عاشوا معانا و كانوا ف دمنا....ذكريات فترات عمرنا....................

اعتقد ان كتير مننا عنده هوايتي من وانا طفل صغير وانا باحب اكتب ف اجنده صغيره حاجه مريت بيها فرحتني زعلتني ...ضحكتني بكتني .......خلتني للناس حبيب.............و كرهت بعضهم حتي بدون ذنوب ............

ليه منفتكرش مع بعض واللي كاتب حاجه لذيذه مضحكه او محزنه مفرحه او مخجله ....تعالوا نفتكر نرجع ايام زمان اللي احنا عارفين انها صعب ترجع ............بس نقدر نرجع بنفسنا للحظات انا عن نفسي باتمني اني ارجع لها............

يلا كل اللي كتب حاجه حلوه قديمه تحس بيها انك بتفتكر طفولتك شبابك وقت مضي و السلام......

وربكم ذو العرش العظيم ماحد يكون كان بيكتب حاجه و بيسجل خواطر او حاجات من دي و يدخل التوبيك و ميكتبش حاجه ....

عاوزين نعرف احنا كنا ايه و احنا صغيرين...ووصلنا لأيه لما كبرنا ...اتغيرنا كتير ...ولا مفيش تغير....بنت الجيران و ابن الجيران حبي اللي كان و لعبي ....ضحكي مع اصحابي اللي مبقتش اشوفهم....ولا حتي بنسأل عن بعض.........اللي منكم مكنش بيكتب لو ليه ذكري او حاجه زي اللي انا كتبتها او موقف حصل من الاهل القرايب ..يقوله.....خلونا نعرف بعض من جوا زمان كنا عاملين ازاي

انا هابدأ

انا كنت باكتب كده ... وانا صغير شويه ...

بسم الله الرحمن الرحيم ..

المكان شقتنا ف شارع عمر بن الخطاب بحوض عشره ((الشقه القديمه بتاعتنا ))
التاريخ:3/10/2004

انا::عمري::15سنه الصف الثالث الاعدادي
هي عمرها::13سنه الصف الاول الاعدادي


الوقت الساعه 4.12 بعد منتصف اليل و الدنيا فاضيه وانا واقف ف شباك اوضتي و الشارع بتاعنا فاضي ....يا تري قاعد باعمل ايه ... قاعد ببصبص لبنت الجيران طبعاً..يا سيد خش نام مش هتطلع علشان تقفل الشيش بتاع البلكونه بتاعتها و مش هتخلي يوسف ((اخوها الصغير D:)) يقولي سيد سيد ..بس مش هيجري حاجه يعني ماهي واحشاني و مش عارف اشوفها و بكره مسافره..يادي مصر يا اميره اللي لازم تعيدي فيها طيب مانا مرزوع هنا ف بيتنا و مش هاخرج لو سافرتي.....لما جيتي النهارده من المدرسه كان شكلك امور خالص او مره اشوفك لابسه مريله زرقا كبرتي والله و بقيتي ف اولي اعدادي ولبستي حجاب كمان...الله يرحم لما كنت بتلعب ف الشارع حافيه..بس تصدقي شكلك ف الحالتين حلو بحجاب و من غير و غير كده مانا عارفك و حافظ شكلك بالطرحه و من غيرها و هي يعني جيره يوم ولا اتنين !!....وادي ابو الرخامه صليحه خرج ف بلكونتهم....بيبص عليا و علي الدور الرابع ((علي بيت اميره يعني )) و بيقول " ياض خش نام مش هينفعك الكلام ده انت شهاده السنه دي الله يخربيتك..امال عاوز تدخل 1/1 ازاي ف مدرسه السلام (( مدرستي الثانويه )) السلام الثانويه النموذجيه بنين......و مين خرج تاني ف البلكونه.....دعاء..ههههه اخت محمد طبعاً ...اللي هي اكبر مننا بسنتين......بتقولي...بصوت واطي " اندهلك عليها علشان تخش تنام انت صعبان عليا ياواد.....وانا قولت الله يخربيتكم يا ولاد صلاح انتم بتسيحوا ولا ايه الشارع كله هيسمعكم...انت ياض مش نازل تصلي الفجر ؟؟ محمد بيرد....انت ناوي ...قلتله ناوي....قال..لأحسن تقفل الشيش من غير ما تشوفها واحنا ف الصلاه...قولتله مش مهم...الصلاه اولي ...قال..دي مسافره بكره...قولت اللهم اخذيك يا صليحه ..انت بتحرضني ياد علي الفساد...ولسه مكملتش و خرجت البلكونه :&^اميره:&^ و هي فعلاً احلي اميره..ابصلها و تضحك و تقعد نتنح لبعض و تعمل مكسوفه ..و فيه ناس رخمه بتقول الدنيا برد خش نام انت برضه "عليها"....وانا ابصلهم زي اسكتوا يا ولاد الذينه..هتخش و مش هاشوفها قبل 10 ايام تاني..قعدت واقفه حوالي 12 دقيقه و بعدين اذن الفجر...دخلت وقفلت البلكونه وانا نزلت اصلي انا و محمد صلاح...وو بعد الصلاه قعدنا اكترمن ساعتين ف الشارع..وباصص علي شباكها والاقيها بتبص من ورا الشباك و النور منور......و ما عاوز ادخل بيتنا.........وبعدين دخلت تنام..اصلهم مسافرين ف قطر الساعه 12الضهر ..علشان يعيدوا ف القاهره..ماهي اصلا مش من قنا...دخلت انام و معرفتش انام...هاقدر استحمل 10 ايام ماشوفهاش ..يارب ترجعي بدري ولا بيت عمتك يولع و ترجعوا بكره بليل.. تصبحي علي خير يا اميرتي ..............

يلا مين بعدي ... اكتبوا ارجوكم فضفضوا ..محدش يقول قصه حلوه يا سيد و بس ..انا عاوز قصص و كلام...

بجد روووعة التوبيك ده ودايما افكارك ذيذة بس اللي ضايقني اني مفيش تفاعل مع الموضوع بس مش مهم انا جيت
انا بقى هحكي حكاية كانت تقريبا وانا في اولى اعدادي كنت انا وواحدة صحبتي قاعدين على السلم بنحكي وكده يعني المهم عندنا راجل جيرانا عصبي جدا لابعد الحدود طلع وبصلنا بصة مريبة واحنا بنحكي وبنضحك المهم كان معانا على السلم ورق بتاع مدرسة للمذاكرة يعني قام الراجل اخده ودخل البيت احنا طبعا ااحترنا نعمل ايه روحت انا ناديت باقي اصحابي ولدين وبنت وانا وصحبتي وحكيتلهم الحكاية واتفقنا اننا هنرمي طوب على باب شقة الراجل ده ونجري ((مجرمين)) المهم وكان اول واحد طبعا ضحينا بيه (عبدالله) ده كان بجد اقرب واحد ليا بس هو اصغر مني المهم قام جاي يرمي الطوبة ومن حسن حظة كان الراجل بيفتح الباب قامت الطوبة جات في الراجل المهم كلنا طلعنا نجري فوق على السلالم مش تحت والراجل طالع يجري ورانا صحبتي كان باب شقتهم مقفوول قعدت تخبط جامد وماحدش فتح وانا كنت سايبة الباب مفتوح قمت جريت ودخلت بسرعه وقفلت الباب وسيبت اصحابي بره وجه الراجل زعقلهم وعمل مشكلة معاهم بس بعدها كلهم زعلوا مني بس طبعا مش كتير يعني شوية كده وصالحتهم ورجعنا زي الاول ....
المشكلة ان دلوقتي مع انهم معايا في العمارة مش بنشوف بعض ولا بنكلم بعض
وكل مافتكر حاجة هكتبها هنا انتظروني...

مش عارف ليه حاسس ان من كلامك انك اكيد اكيد اكيد لو انتي من قنا ..تبقي تعرفي بسام بتاع الجيتار (( اللي من حوض عشره )) اخويا..ههههههههه هو مش من اصحابك بس عبد الله اللي هو اصغر منك ده برضه تقريباً عبدالله اخو دعاء عبد الفتاح.......ههههههه ايه الاجرام ده يا بنتي.. حرام عليكم...الراجل تعبان نفسياً مثلا مراته لسه مديله علقه ولا حاجه.... و بيطلع غلبه فيكم استحملوه شويه ده الجيران لبعضها........... و ايه الوطينه دي ..تسيبي اصحابك بره..هههههههه كويس انهم مضربوش علشان زي ما بتقولي الراجل (( غبي و عصبي ))..طيب هو فيه سؤال...انتي ليه انتي و اصحابك مبتكلموش بعض..مع انكم ف نفس العماره ..طيب انا يعتبر علاقتي ب صحابي القدام مش قويه دلوقتي علشان كل واحد فينا راح كليه ف بلد مختلفه انا فضلت ف قنا و هما اللي راح اسكندريه و المنيا و الفيوم و القاهره و اسماعيليه و اللي دخل CIC واللي دخل هندسه و شرطه كده يعني .. اتفرقنا مبقيناش مع بعض..انتي بعدتي عن اصحابك ليه...اه صحيح نسيت اقولك..كل ما ف الامر ان التوبيك محصلش فيه تفاعل..ان انا نزلته من هنا و قبل ما اي حد يرد...نزل فوقه مواضيع كتير...ف محدش شافه...بس

نورتي يا عثل ......هههههههههه نورتي يا عازفه و انا سعيد ب ردك و تفاعلك معايا ف التوبيك

اولا ايوة انا مش قنا نفسها وممكن اكون اعرف باسم بس شكلا ماعرفش اسمه وكده بس عبدالله مالهوش اخت اسمها دعاء ولا ابوه اسمه عبدالفتاح .ماعلينا
ماعرفش ليه بعدنا عن بعض بالطريقة ديه ممكن تقوول ان كل واحد مشغول في دراسته ومذاكرته بس مش لدرجة اننا ننسى صداقتنا واجمل ايام قضيناها سوا ولو قدرنا نعمل كده المفروض عبدالله ماينساش ابدا لان انا وهو كنا عاملين ثنائي مجرم جدا كنا لما نلعب نتفق مع بعض على باقي اصحابنا ونعمل فيهم مقالب وكده يعني بس تعرف لو اتقابلنا دلوقتي في الشارع ممكن مانعرفش بعض من كتر ماحنا من زمااان مانزلناش سوا مع اننا في عمارة واحدة ...

علي فكره اخويا اسمه بسام مش باسم... بس حكايه عبد الله دي انا افتكرت انك ساكنه ف البرج بتاع شارع المينا النهري ف جه ف بالي عبد الله تاني يعني .... مش شرط تكون صداقتك ب عبد الله بس حاولي تشوفي فين الغلط اللي صدر منك او من اصحابك القدام و تحاولي تتفاديه مع اصحابك الجداد و صدقيني هتلاقي العلاقه شكلاً و مضمونا جميله جداً و مفيش بينكم غير صداقه و محبه

اولا سوري ماخدتش بالي وانا بكتب
على فكرة مفيش مشكلة بيني وبين اصحابي ولا اي حاجة وكله تمام بس كل واحد مشغول وبقينا مش بنسال على بعض زي زمان وبعدنا شوية بس يعني لما نتقبل محتفظين على صداقتنا بس نادرا نتقابل

lol

بتفكريني ب اصحابي القدام بس هما ليهم ظروفهم اللي انا مقدرها علشان كده مش بازعل منهم ... هما كلياتهم ف بلاد تانيه و مبشوفهمش غير ف الاجازه.... ف دي حاجه انا دايماً حاططهالهم عذر

فيه مثل بيقولك ان لم يكن لأخيك عذر ف اختلق انت له عذر والف عذر

يعني متستناش الفرصه اللي تسيب فيها صاحبك او صاحبتك علشان غلطه بسيطه او ظروف خارجه عن ارادته

حاولي تتقربي من صحابك القدام طالما انتم ف نفس البلد و قريبين من بعض و مش مهم انك ترجعي تكلمي صاحبك الولد خليكي فاكره انك كبرتي و هو كبر اكيد برضه ... ف بقي فيه شكليات و منظور اجتماعي ممكن تخليكم متكلموش بعض

عادي جداً

اوك انا معاك في كل حاجة بس على حكاية اني ماكلمش الواد وكده يعني اولا هو اصغر مني وثانيا هو من زمان بالنسبة ليا اخ عزيز جدا بس المشكلة ان هنا مفيش حد بيفهم او يقتنع بكده ومقتنعين بان كلام البنت مع الولد غلط مع اني ممكن اتكلم مع اي حد بس بحدود مايتعدهاش يبقى فين المشكلة هنا؟؟

المشكله ف الناس .. تقدري تمسكي لسان حد انتي ؟؟ ولا تخليه يقول فلانه بتمشي مع فلان و كمان اصغر منها ... و تحفظي احترامك لنفسك بعدم كلامك معاه طالما هو اصغر منك

اكيد لا ومش هقدر اغير كل الناس

بس هي دي كل الحكايه ... ان لم تستطع منع الناس عن الكلام عن افعالك فامنع نفسك من فعلها