أمر واقع لازم نتعامل معاه

السلام عليكم ياجماعه
طبعا خلاص احنا أصبحنا أمام أمر وقرار منع دخولنا الجامعه أصبح نهائى
بس إحنا اتكلمنا مع الدكاتره وقالولنا ان ده مش ذنبهم وانه مستعدين انهم يشرحولنا
بس ده قرار وزارى وكمان هما مش مقصرين لانهم شغالين مع انتظام ولو انتساب عاوزين يحضروا
هما مالهمش دعوه
بس احنا مش لازم نسكت لازم نشوف حل غير موضوع الدخول ده
وأنا بفكر معاكم بصوت عالى وجاتلى فكره يمكن تكون كويسه وممكن لا بس أنا هطرحها يمكن تطلع كويسه
أنا بقول ان احنا نرفع مذكره للعميد نشرحله الوضع اللى احنا فيه على اساس انه مش عارف حاجه
ونطلب منه ان يجتمع بالدكاتره ويطلب منهم عمل امتحان لانتساب غير امتحان انتظام
بحيث يراعى ان احنا مابنحضرش والكتب طبعا محتاجه لمفسرين فلازم يراعوا ده
وبس احنا نذاكر من الكتاب المرجع الوحيد لنا
ايه رأيكم ولو حد معاه فكره أحسن ياريت يقولها
وربنا يستر

شكرا جدا يا " بنت الاسلام " على طرحك للموضوع ده
بس حضرتك لازم تعرفى ان الدكاتره عارفين وضعنا أكترر مننا شخصيا
لان همن لما كانوا بيشرحوا وكانت النتيجة مش كويسة فتخيلى بقى انهم مش بيشرحوا أساسا.... وبكده احنا لسه فى المشكلة صح
طيب خلينا نعمل معادلة بسيطة ونشوف ايه مكاسبنالو عملوا أمتحان مختلف عن أنتظام
1- حنكسب...انهم ممكن يحطوا أمتحان سهل (وده وارد الامع البعض)
2- حنكسب ... تصحيح متساهل وده بردوا ممكن
3- حنكسب ...درجات رائفة (بس دى أتلغت علشان مشروع الجودة)
4- حنكسب ....يمكن يخلوا نسبة النجاح عالية
طيب ايه المشكلة ...
المشكلة انهم (الدكاترة ) عارفين أننا حناخد المحاضرات من بتوع انتظام زى كل سنة .... ده غير انهم عارفين ان السنترات (الفرسان و حورس وغيرها كتييير ) مش حتقعد ساكته وبكده ممكن يحطونا فكفة وحدة مع انتظام فى ميزان الامتحان.
واسف انى أقولك " بلاش الحماس ياخدك " لان محدش حيقدر يتكلم
لان كان من ضمن الدروس اللى أتعلمناها (أسكت أنت محدش عينك محامى عن الطلبة "
خلى الموضوع ده لربنا

شكرا على مجهودك يا بنت الاسلام مع احترامى لوجهة نظرك انتى و Soa لكن انا ليا راى تانى حضرتك قولتى انى العميد مايعرفش حاجا ولازم نرفعلو مزكرة انا متعارض معاكى فى رايك داه لانى العميد 100% عارف بالحاصل بل بلعكس انا اعتقد انو اول واحد يهمو انى الطلبة تعيد السنة ويزيد الفلوس وترتاح معاه الدنيا واحنا نكون طالعة روحنا (انا راى ان نرفع مزكرة لرئيس الجامعة شخصيا) باعتبارة الشخصية الوحيدة الى ممكن تجبلنا حقنا ودى بصراحة وجهة نظرى مع خالص الشكر والتقدير Thanks

بسم الله الرحمن الرحيم
أزيك يا أكشن ....
بص بقى يا سيدى مش حينفع ترفع مذكرة لرئيس الجامعة ....عارف ليه
والسبب بسيط جدا لانك كده اتعديت سلطة عميد كليتك وده عيب طبعا ومش مقبول عند رئيس الجامعة نفسه .......مع شكرى وتقديرى الشديد ليك ..... أخوك محمد

soaأولا بشكرك على ردك أخى
ثانيا احنا عارفين ان الدكاتره حاسين بنا بس حاسين ان احنا ممكن نجيب المحاضرات من انتظام طيب واللى مايعرفش حد انتظام يعمل ايه هتقول يجيبها من السنترات اللى انا سمعته ان دكتور جمال رفع قضيه على الفرسان وبكده مش هتكون فى محاضرات فى الفرسان وكمان الباقيين هياخفوا قولى انت ايه الحل نروح فين أنا واحده من الناس اللى مش عارفه أجيب محاضرات لغاية دلوقتى ماحدش فاضى يدى محاضرات لحد وكمان اليوم اللى معمول لنا انتظام مش هيجوا فيه نعمل ايه ياأخى
وأنا مش واخدانى الحماسه لانك انت مش حاسس باللى احنا فيه علشان كده بتتكلم كده
وكمان ماعينتش نفسى محاميه عن حد أنا قولت لزمايلى انى بفكر معاهم فى حل بحيث نعدى السنه دى على خير ياريت ترجع وتقرأ الموضوع تانى لانى كمان قولت دى مجرد فكره واللى عنده فكره احسن يقولها ياأخى العزيز

انا ضد جكاية ان العميد مش عارف حاجه بعدين انتم ليه هايفيين من مقاطعه الكتاب الجامعي ده كتاب ملهوش لازمه اذا ما شرح
يا اخواننا ما تشتروش الكتاب مالمصيبه ما تبقاش علينا لوحدنا

لازم الدكاتره يدوقوا شويه اما ان حضراتكم يكون عاوز يشتري الكتاب علشان يحافظ على دخل الدكتور فهذا غير مقبول وغير مبرر

والي عايز الكتاب يبقى يصوره المهم ما تدفعش للجامعه
ولا ايه رايكم

ياعم خلاص الناس اشترت

احب اوضح حاجا لاخويا محمد كنت بتقول انى ماينفعش انى نرفع مزكرة الى رئيس الجامعة لانى بكدة اكون تعديت سلطة العميد يامحمد الى هايخلنى اتعدى سلطة عميد كليتى ويخلنى ارفع مزكرة لرئيس الجامعة اكيد فى سبسب معين انو عميد كليتى من الاخر راجل دماغ ........... مفيش حاجا هماه غير انو يقبض مرتبو كل اول شهر ويسقطنا فى امتحاناتو ومش مهم اى حاجا تانى ودى اول حاجا هشرحا لرئيس الجامعة لما ارفعلو مزكرة لازم اوضحلو انى اجبرنى ان ارفعلو مزكرة انى العميد نفسو راجل لا يعتمد عليه دا لو اى واحد معدى الشارع مسك عمييد كلية مستحيل يكون زى جمال ابراهيم باشا فى نظرى انى الراجل داه لا يستحق انو يكون عميد او حتى دكتور او استاز فى مدرسة ابتدائية صدقونى ياجماعة ده ظلم فى حاجات كتيير بنسكت عليها سكوتنا داه هو الى وصل العميد لكدة مع كامل احترامى لاراكم بصفة عامة ومحمد Soa بصفة خاصة ThanKs

انا بفكر اعمل فى المنتدى موضوع اسمة انضم الى رابطة كارهى جمال ابراهيم من كتر الظلم الى احنا فيه والله

ياجماعه أنا بقول على فرض انه مايعرفش حاجه
يعنى نشرح له كل ملابسات الموضوع أنا عارفه انهم عارفين كل حاجه وساكتين
واحنا خلاص اشترينا الكتب وعدم شراء الكتب مش هيعمل حاجه لان ممكن الدكاتره يعندوا معانا
يعنى يسقطوا نصنا والباقى يطلع بمواد أوينجح بالعافيه
المهم لو فكرتى دى مزعلاكم أنا سحبتها
وشكرا لكل اللى ساهم فى الموضوع

اولا يابنت الاسلام كويس انك فكرتى فى نفسك وفى غيرك بس حاولى كدا تقدمى مزكرة وحتقدميها باسم مين؟
بنفسك؟ مش هينفع ولو حصل هيقولك سيبى المزكرة هنقراها بعدين ..واتفضلى انتى.. وبعد كدة كل سنة وانتى طيبة
هو الحل زى مقولنا طلبة انتظام هى الى توفر المحاضرات وتنزلها على المنتدى او حتى فى موقع الجامعة

احنا خايفين مانفهمش المحاضرات من غير شرح
بس خلاص ياريت تكتبوها بشرح وافى ربنا معانا ومعاكم
وأكيد ألف شكر لكم على احساسكم بينا
وشكرا على مروك

اولا سنترات الفرسان او غيرة زى حورس بيعتمد على اية غير محاضرات الطلبة يعنى هما هياجى بنفسم يحضروا لا طبعا
وانا واحد صحبى هو الى كان بيدى المحاضرات للفران والله وكان قصاد عينى
متقلقيش ياجميل
ويارب تكون بخير

بسم الله الرحمن الرحيم
أزيكم يا أخواتى .... والله انا حبيتكم جدا وعلى فكرة انا فرحان بيكم جدا لاسباب كتيييرة يمكن أولها "لغة الحوار الراقى " اللى بينا وبين بعضينا وتانى حاجة " الاحترام بين الاعضاء "

بصوا بقى أنا والله مش معترض على اى حاجة فمصلحتنا
وكمان علشان الاخت " بنت الاسلام " متفهمنيش غلط انا لما كنت بقولك على همن " خلوكى محامية " دى مش معناها انا بغلط فيكى لاسمح الله ابدا انا كنت بوريكى نموزج من كلمة أقعد ساكت بس بأسلوب تانى كانوا بيقولوه عندنا ....
أما بخصوص موضوع الحضور يا جماعة فى بشرة حلوة جدا

أعلن مصدر مسئول فى كلية التجارة جامعة جنوب الوادى
:::::""" يا جماعة لو أستمر الوضع على ماهو عليه حيكون فى أمتحان لانتساب غير امتحان انتظام وحيكون سهل خالص ده غير ان الدكاترة حيدوكم سؤال ب 25 درجة هدية لكل طالب وده غير طبعا رحمة التصحيح """::::
_______________________أخوكم محمد_____________________

شكرا يامحمد وماتزعلش منى بس أنا والله مش عارفه أعمل ايه
لاننا مش عارفين ندخل ومش عارفين نفهم اشترينا الكتب ومش عارفين نفك الطلاسم اللى فيها
وكمان أصحابى قالولى ان الدكتور محمود عبد الرازق شرح المحاضره الاولى ولا كلمه فى الكتاب
نعمل ايه واحنا خلاص فى أخر سنه يعنى عاوزين نعدى على الاقل صافى
والله اللى عاوزه ربنا هيكون وربنا يقدم اللى فيه الخير
بشكرك وبعتزر مره أخرى

شكرا ياجوكر ربنا يخليك
وبشكرك على تعاونك بس أنا أصلا عمرى مافوت محاضره
علشان كده حاسه بالفرق
بس مش مشكله ربنا يستر ويعدى السنه دى على خير
وبشكرك مره تانيه ياأخى الفاضل

متقلقيش وسبيها على ربنا وكله هيعدى على خير انشاء الله

لا ياعم مفيش زعل والله وبكررها تانى
أنتوا أخواتى........................أخوكم محمد

متقلقيش يا بنت الاسلام لانه كل حاجه نصيب واحنا ان شاء الله معاكم

الله يامحمد بجد انت من الناس الجامدين فى المنتدى وبجد مشكور على الاخبار الحلوة