الحب الإلكترونى...،لازم اخوانى الشباب يدخلوا ويقولولي رأيهم عشان هو مهم جداعندي

[i]الحب الإلكترونى
اكيد كل واحد سمع عن الحب ع النت أو ممكن يكون عاش الوهم ده،الله أعلم اذا كان ده وهم ولا لأ‏!
بس انا حبيت اعرف منكم هل ممكن يكون الحب بالشات أو ع النت حب حقيقي،هل ممكن لشخص ان يحب شخص آخر دون أن يجلس معه ويتحدث معه وجها لوجه.
سؤال محيرنى وحابه أسأله لإخوانى الشباب بالمنتدي:
هل ممكن ان تحب فتاه ع النت وأنت اساسا متأكد من أنها اتكلمت مع كتير غيرك قبل كده ؟
سؤال تانى اخير عشان انهي التوبيك بتاعي:
ايه رأي اخوانى الشباب في البنات اللي بيكلموا اغراب ع الشات ؟هل هم أهل ثقه ام لا؟
ارجوكم لازم تردوا عليا عشان الموضوع ده مهم جدا بالنسبه لي شخصيا.

اولا هانقل الموضوع لقسم الحب والشعر و الرومانسيه..بصفتي مشرف قسم كليه الاداب والقسم هنا مش مناسب و علشان الناس كلها تتناقش معاكي فيه و تستفيدي بأراء الجميع

و بعد نقل الموضوع....... انا هاقولك رأيي

بصراحه موضوع الحب علي النت و الكلام ده احياناً بيكون نابع من فراغ عاطفي بحت..يعني انت مش مرتبط عاطفياً ف الحقيقه و في حاله احتياج عاطفي لأنك ف مرحله تعتبر مرحله صدق وجداني و هي مرحله ما بين ال 18 لسن ال 28 سنه...بمعني انك بتكون عديت مرحله عدم انضباط المشاعر ف سن المراهقه من 12سنه ل 18 سنه

بتكون متزن عاطفيا يعني وخلاص مؤهل لفكره انك تحب و تتحب ... فكره الحب ع النت فكره ليست بالمحرمه او السيئه او الممنوعه او حتي الخاطئه..لا يا جماعه طيب والله العظيم انا شخصياً اعرف ناس اتعرفوا ع النت و حبوا بعض و انكتب كتابهم حاليا يعني اتجوزوا.. و سعداء جداً مع بعض و الثقه ملياهم..بصوا هو المشكله مش انك تحب من ع النت او من بره المشكله هي ازمه الثقه اللي بقت موجوده بين شباب و بنات وقتنا ده... الشباب معندهمش ثقه ف البنات الواحد بيقول ف عقله(( يا عم وانا ايه اللي عرفني انها انسانه سويه ماهي ممكن تكون عامله نفسها محترمه قدامي و ليها علاقات بشباب تانين غيري و بتقول ان مفيش ف القلب غيرك يا حبيبي)) و البنات يقولوا " ده بيعرف مليون واحده و فاكرني عبيطه و هاصدقه و الله لو ما جه البيت و ف ايده علبه الشكولاته و كلم ابويا ماهعرفه تاني ... و تفتكر انه طمعان فيها مش اكتر ))

المشكله مش ف النت او في غيره ... هو الاختيار... و حطوا تحت كلمه اختيار دي مليون خط... والله انت واثق ف اختيارك حتي لو مقابلتوش حتي لو مشفتوش حتي لو مقعدتش معاه حتي لو....حتي لو..... ومليون حتي لو............... انت حاسس من جواك ان الانسان ده سوي ؟؟ ولا لا...حاسس انه معتدل ولا لا حاسس معه براحه و امان ولا لا...........حاسس انك مؤهل نفسيا لكلمه حب بصدق !! كلمه حب متخرجش غير من القلب.... كلمه حب متخرجش غير للي يتحب.......يبقي مش المشكله ف الحب او ف غيره.........المشكله فينا

انا زي ما قولت قبل كده حب النت مش جريمه ولا حرام ولا ممنوع ولا غير مرغوب فيه.... وقت ما يتوافر الصدق و الاخلاص و الوفاء ف العلاقه بتتلاشي اي مقومات تانيه..........

انا عن نفسي ليا كذا صديقه من مصر و من بره مصر و مرتبط بيهم ارتباط رهيب بالرغم من اننا مشفناش بعض غير صور و بس او مايك وحاجات من دي .. انا والله باحكي لهم لما باكون تعبان اللي مبحكيهوش لأصحابي اللي ف الحقيقه............ و بحبهم جداً و اكتر من اخوات

انا طولت و رغيت بس معلش الموضوع يحكم بكده......... بس هارجع و اقولك..اغلب الوقت بيكون "" تضيع للوقت "" ف حالات نادره تكاد تكون منعدمه تميل الي نسبه اقرب ب ال 10% بتكون صادقه .. انا مش هابالغ و اقولك واحد ف الميه و كده زي ما فيه ناس بتقول....لا حب النت و ارتباطه موجود................بس ده بيكون نابع من صدق الطرفين....مش حد فيهم بيتسلي و حد بيحب بجد

اسف لأطالتي و تقبلوا رأيي المتواضع....... ويسعدني لو فيه اي تعقيب علي كلامي انا مستعد للنقاش

Sassy_Classyعلى فكره كلامك ده جميل اوى وانت قولت على كل واحد ممكن يقول حاجه يعنى بمعنى اصح جبت كل اللى تقال ولخصته صح كتير بس جبت كلام فى الحقيقه وسمعت عنه كتير بس اظن فى الاغلب ان اى حد مش بيثق اللى يكون شايفه هى صحيح ثقه مش كامله بس على الاقل بيكون شايفه ادامه**** كل حاجه فى الدنيا فيها الكويس والوحش وفى الاخر كله بيكون مقدر ونصيب لازم نرضى بيه .....

انت قلت الكلام الى بيحصل فعلا مع اغلب الناس الى بتتعامل على النت

انا بشكركم كلكم ع مروركم.
انت بجد هايل ياسيد وفاهم وناضج فكريا، انا بصراحه مكنتش فاكراك كده،
وعموما بشكرك جدا ع مرورك و ع مرور كل الأخوة،
ومتقولش ع نفسك كده انت مش رغاي ولا حاجه

يا جماعه انا قلت كلام باختصار... واقع و ناتج عن تجارب شخصيه ليا انا شخصيا و غيري من اصدقاء و ناس اكبر مني سنا و بكتير كمان... بس

و حكايه مكنتيش فاكراني كده يا شيري .. انا هاعذرك المره دي علشان بس انتي متعرفينيش غير ظاهراً بس احنا اه دفعه واحده و زمايل ادي السنه التاله لينا بس انتي متعرفينيش غير اني واحد معاكي ف الدفعه و تقريبا والله اعلم كنتي واخده عني فكره غلط ..ههههههههههه ... انا هاموت و اعرف ليه ... عامه حصل خير و عادي و زي ما قولت قبل كده ف موضوع للورده الوحيده.... افهموني بقي ...بس

شكرا يا شيري و شكراً لجميع الاعضاء اللي عجبهم كلامي ف الكومنت..... و يارب اكون قدمت لكم افاده......... يا جماعه اي واحد مننا بيعيش تجربه... المنطق و العقل بيقول انه المفروض يحكيها لغيره علشان يستفيد و ميغلطش غلطه و ده اللي انا باعمله بمنتهي الامانه مع اصحابي و الناس اللي اعرفهم .... يمكن ساعات الناس بتفهمني غلط .... بس عادي مسيرهم يفهموني صح ولا ايه ؟؟

نورتوا يا جماعه و انا سعيد بالكلام معاكم

مفيش حاجه اقدر اقولها غير ان انت هايل ياسيد

ربنا يخليكي ..انا مش عارف اقول ايه.....اخيراً فيه ناس من اداب دخلت معانا المنتدي لا ده مش من اداب و بس ده من دفعتي و قسمي كمان... انتي لا تتخيلي سعادتي بالموضوع ده............ يلا عقبال الدفعه كلها و اداب بجميع اقسامها

انا من راءى مفيش حاجه زى كده ولو فيه بعتبره خداع وخيانه وشباب كتير بيعمل كده قال ايه بحبك وانا اتعلقت بيك وكده يعنى لغاية لما يوصل للى عايزه والله اعلم ايه بعد كده .
معلش ده راءى منتهى الصراحه اصلى كمان حصل موقف زى كده مع واحده كنت اعرفها ومن ساعتها معرفش عنها اى حاجه .

شكرا ياجماعه ع مروركم،
ع فكره ياسيد انا عضوة في المنتدي من20 سبتمبر بس مكنش ليا نشاط
وقبل كده كنت بدخل المنتدي كزائر بس،
وميرسي ع ذوقك وذوق اخي الفاضل محمد ضياء و ع رسالته

اولا انا بشكرك على الموضوع الهام جدا دة لانه بيحصل كتير فعلا اليومين دول خاصة زى ما قال سيد اللى بيكون عندهم فراغ عاطفى
اما رايى فاحب اوضح اولا ان انا مش رافض الحب عن طريق النت رفض مجرد او رفضة لذاتة لانه عن طريق النت كل ما فى الموضوع ان الحب باختصار مشاعر نبيلة و صادقة ومتبادلة بين طرفين يبقى بالتالى لازم يكون الطرفين دول على الاقل قابلوا بعض خاصة وان اكيد فى جزء من الحب دة بيكون على الشكل مثلا وجزء تانى على الارتياح اللى ممكن يشعر بية الواحد اول ما يشوف حد ولو مرة واحدة وجزء من التوافق الفكرى بين الطرفين ودى اهم حاجة
كمان فى حاجة مهمة خاصة بالنسبة للبنات اية اللى يخلى الواحد او الواحدة يضمن ان اللى بيكلمة صادق فى احساسة ومش بيتسلى خاصة وان عند غالبية الولاد فكرة ان البنات اللى بتدخل على النت وبتقبل انها تحب شاب بتكون مش محترمة لانه اول حاجة بيفكر فيها انها كلمت شباب كتير قبلة فى الحب وهو مش اول واحد
وانا قلت للبنات خاصة لان غالبية البنات مش بتقول كلمة بحبك لحد غير لما تكون صادقة فى كلامها وبالتالى لو طلع الشاب اللى بتكلمة بيتسلى ممكن تنهار عاطفيا ويمكن نفسيا ويمكن تتعقد خالص وتعمل جروب على الفيس بهدف ابادة الرجالة زى ما هو حاصل حاليا
وللاسف انا اعرف اكتر من حالة بتحب عن طريق النت وعلى فكرة منهم حالة لشاب بيحب واحدة بس المشكلة انها من دولة شقيقة ودا كلة عن طريق النت طبعا وهى بتحبة جدا انا قصدى من كلامى دة ان فى شباب ممكن تحب عن طريق النت بس عايز اقول انه واحد فى المليون
خلاصة الكلام ان الحب على النت صعب جدا ان لم يكن مستحيلا خاصة من قبل الشباب
واسف على الاطالة
ميرسى على التوبيك الجامد دة

شكرا ع مروركم اخوانى الافاضل،،،،،
وأنا بجد مهتمه بارائكم لأنها هتفرق معايا جامد