رباعيات صلاح جاهين

أنا اللي بالأمر المحال اغتوي

شفت القمر نطيت لفوق في الهوا

طلته ما طلتوش إيه انا يهمني

و ليه .. ما دام بالنشوة قلبي ارتوي

عجبي !!



بره القزاز كان غيم و أمطار و برق

ما يهمنيش – أنا قلت – و لا عندي فرق

غيرت رأيي بعد ساعة زمان

و كنت في الشارع .. و في الجزمة خرق

عجبي !!!



عيني رأت مولود علي كتف أمه

يصرخ تهنن فيه يصرخ تضمه

يصرخ تقول يا بني ما تنطق كلام

ده اللي ما يتكلمش يكتر همه

عجبي !!!!



يا عندليب ما تخافش من غنوتك

قول شكوتك و احكي علي بلوتك

الغنوه مش ح تموتك إنما

كتم الغنا هو اللي ح يموتك

عجبي !!!



خرج ابن آدم من العدم قلت : ياه

رجع ابن آدم للعدم قلت : ياه

تراب بيحيا ... وحي بيصير تراب

الأصل هو الموت و الا الحياه ؟

عجبي !!!


منقول عن صلاح جاهين

ميرسي جدا ليك
والله الراجل دا فلته ومش هيتكرر

ميرسي ليك

جميل قوي بجد ميرسي ليك
تقبل مروري

مش هقول غير انه احلى كلام قريته ف حياتي
تسلم اديك

بجد بجد انت بوب انا بحب صلاح جاهين قوى قوى شكرا

الله يرحمه عن جد يستاهل الراجل التخليد معظم اعماله حلوه وجريئه وخصوصا رباعياته دي انا بحبها اوي مرسي ليك