مبارك

السلام عليكم
انا عيازةاقول لكم جاة مهمة تيجي ياجماعة نقول رأينا بصراحة في الرئيس مبارك
وانا حقول لكم رأيي وهو انه رئيس كويس محدش ينكر انه غير حجات كتير بس يمكن يكون اللي حوليه هما اللي مبوظين الدنيا ياريت تقولوا رايكم ولو ترشح البرادعي للرئاسة توافقوا ولا لأ.
يارب الموضوع يعجبكم وتردوا عليه

موضوع جميل انا من رايى مبارك رجل السلام والامن لمصر وانا ارشح مبااااااااارك عن نفسي وشكرا على الموضوع الجميل ده soso

انا عن نفسي احب ان الرئيس مبارك يستمر لحجات حلوه فيه كتير
يعني زي ما قولتي انه عمل حجات كتير اوي للبلد
تاني حاجه الرئيس مبارك تحسي كده انه له شخصيه مع الدول الخارجيه
اسلوبه ف الحوار كمان مع رئساء الدول دي
عنده فكر ووعي سياسي كبير نتيجه الفتره الى اخدها ف السياسه
والرئاسه حجات تخلي اي حد حتي لو مش بيحبه
علي الاقل مطمن انه ف حد يعتمد عليه ماسك البلد.....

البردعي طبعا الناس كلها حاطه املها عليه عشان التغير الى الناس متوقعه انه يعمله للبد
مع انه مفيش جديد هيحصل للبلد
عشان مصر دي دوله مؤسسات يعني الحكم فيها بيكون برغبه فئه معينه ف الدوله( المؤسسات)الى دخل الدوله بيتبني عليها
مش برغبه الشعوب الى هيه مستهلكه لمنتجات الموسسات دي
يعني الشعب ملهوش لزمه
البردعي مبيعتمدش ف اسلوبه السياسي ع الصدام السياسي
عشان هوه راجل بتاع درسات وابحاث وده بالنسبه للشعب المصري حاجه مش مقنعه عشان يبقي رئيس جمهوريه
البردعي يعني من رائي ميصلحش للرئاسه عشان معندوش خبره سياسيه
هوه اينعم كان رئيس الوكاله الذريه ف الولايات المتحده
بس دي سياسه خارجيه
واحنا بلدنا مصر دي
ليها سياسه لوحدها غير اي سياسه
ده حتي مكنش وزير خارجيه مثلا ولا داخليه
ده احمد درويش وزير التنميه الاداريه للدوله ينفع اكتر منه........



وف الاول والاخر
انت تريد وانا اريد والحكومه تفعل ما تريد

أولا بالنسبه لسياسه الرئيس مبارك الخارجيه اللى معظمنا مش فاهمها ومش واخد باله منها ان عنده قدره وحنكه سياسه فى التعامل مع الدول الخارجيه عشان مصلحه البلد وقراراته بتكون سليمه وواعيه
وزى ما انتى ان بيبقى فى شويه شوائب هى اللى بتعكر جو الصفو دا
اما بالنسبه للبرادعى انه يترشح انا شايفها صعبه
لانه ببساطه شخص معندوش قدره سياسيه تؤهله لحكم الدوله واصدار القرارات
وحاليا الرئيس اجرى عمليه استئصال المراره بالمانيا
ومستشفى هايدلبرج يؤكد استقرار صحه الرئيس مبارك
وبالاضافه كمان انه اصدر قرار جمهورى السيد احمد نظيف اختصاصات ومهام رئيس الجمهوريه كصفته نائبا لرئيس الجمهوريه

وميرسى على التوبيك

الرئيس مبارك اتعودنا عليه من يوم ما تولدنا وطلعنا على الدنيا كان رئيس جمهورية مفيش حد ينكر ان الرئيس مبارك رئيس سياسى بدرجة كبيرة وانا مش متخيل ان حد تانى يكون رئيس جمهورية غير حسنى مبارك . اما البرادعى انا بحبه بس مش عارف حنعرف نختار رئيس جديد غير حسنى مبارك اعتقد ان الامر صعب . ومش بالسهولة المتصوراها لان شعبنا طيب وبيكون مع الكلمة الحلوة مش مثقف بدرجة كبيرة. انتى رايك ايه

لا محمود
انت تريد وانا اريد والله يفعل ما يريد مين دى الحكومة علشان تعمل الله فوق الجميع والله يفعل ما يردي انا اسف جدا تقبل مرورى محمود

لا يابشا
هيه بقيت الحكوه تفعل ما تريد
عشان ربنا من غضبه علينا
وجهلنا احنا الشعب ربنا سلطها علينا عشان تتحكم فينا وفرزقنا ومستوانا التعليمي وكل حاجه ف حياتنا.
بس رحمه ربنا حلوه لانه ع رغم انه مسلطها علينا
لكن في ناس عايشه ومبسوطه وبتقول الحمد لله
(ان الله لايغير ما بقوم حتي يغيروا ما بانفسهم)
احنا قبلنا بالوضع الى احنا فيه
واحنا مش عايزين نغيره او بمعني اصح احنا مش عارفين نغيره.
احنا مش عارفين نختار حكومه لينا
ومش عارفين نختار حد يحكمنا.... انت يعني فكرك الانتخبات والجو الى قلبوا بيه دماغنا ده يحصل بعد منه حاجه ولا اي حاجه الى المفروض يكون هيكون ولا انتخبات رئاسه ولا اصوات ولا اي حاجه احنا بس نسال هما عاييزين مين؟؟ هوه الى هيكون ف المكان ده
يبقي الحكومه تفعل ماتريد ولا انا غلطان
يارجل احنا (شعب بدون كرامه) ده احنا لو حكم ملكي كنا بقينا بكرامتنا
ع الاقل بيموت الملك ابنه بيتولي مكانه من غير نقاش
لكن احنا حكم جمهوري وولا عارفين نغير الريس ولا عارفين نختار الريس
بقينا عاملين زي القطيع الى يمسكلنا العصايه نمشي وراه
والى يقول لا اكنه مقلش حاجه اهيه احزاب المعارضه ماليه البلد
ولا بتعمل اي حاجه.
هيه دي حكمه ربنا سبحانه وتعاله
ناس معاها كل حاجه وبتعمل الى هيه عايزاه
وناس ممعهاش ولا حاجه ومش عارفه تعمل الى هيه عايزاه وساكته ع كده
وناس عايزه تصلح الغلط الى بيحصل بس خساره نيتهم مش حلوه .
وربنا فوق الجميع
والى بيحصل ده ميرضيش ربنا
عشان كده ربنا مش هيصلحلنا حالنا الى احنا فيه ده.

لا مع كامل احترامى للسيد الرئيس طبعا بس انا هرشح البرادعى ومعاه قلبا وقالبا لعل و عسي انه يكون افضل ويخلى للمصري كرامة او بمعنى اصح يرجع للمصرى كرامته

لا طبعا مش معنى ان احناطلعنا ولقينا مبارك رئيس ان احنا ننتخبوا كل مرة ان عن نفسي ارشح البردعي او اي حد يكون صالح للرئاسة لاني عايزة احس بالتغير مع الشكر للسيد مبارك

مــــــبارك اكييييييييييد بجد كفايه اننا عايشين ف سلااام لحد دلوقتي واي انعم في حاجات مش كويسه كتيرره بس دا العيب ف الحكومه اللي بيختارها الريس لانهم مش اد المسؤليه واللي نعرفوا احسن من اللي منعرفهوش
وكمان د- البرداعي كان عايش بره مصر يعني مش دراي كتير بالشئون الدخليه لمصر
وفين برنامجه الانتخابي كل اللي بعرفه عنه غير انه عايز يغير مواد ف الدستور وبعدين هو ععمل ايه لما كان ماسك مدير الوكاله الذريه

مصر لمبـــــــــــارك ومبارك لمصــــــــــــــــر

وتقبلي مروري

هو ليه الناس كلها ردودها سلبية اوى
يعنى هو الرئيس مبارك مش كفاية علية 30 سنة حكم
المفروض بقى يدى الفرصة لغيرة ومفيش احسن من الشعب هو اللى يقرر مين اللى يحبة سواء كان السيد جمال او الدكتور البرادعى او حتى عصام العريان

يعيش الريس
وزى مقال الريس منتدانا كويس
ويارب يطولة فى عمرة
انا والله بحب الريس